Караколдон Олимпиаданын чокусуна: Тимур Шакировдун укмуштуу сапары

Каракол шаарынын тоолорунун арасында өсүп-чоңойгон жигит бүгүн дүйнөнүн эң чоң спорт майданында – XXV Кышкы Олимпиада оюндарында өлкө намысын коргоп жатат. 19 жаштагы Тимур Шакиров – тоо лыжасынын чыныгы жылдызы, ал 6 жашынан бери кар бетиндеги шамал менен жарышып, өзүнүн кыялын ишке ашыруу үчүн талыкпай эмгектенген.

Тимур 2006-жылдын 20-июнунда Каракол шаарында төрөлгөн. Ал шаардагы №11 орто мектепте окуган. Апасы — Шакирова Олеся Григорьевна, атасы — Шакиров Олег Петрович. Жаш кезинен эле спортко кызыгып, 6 жашында спорт мектебине барып, биринчи машыктыруучусу Ирина Волкованын жетекчилиги астында машыга баштаган. 2022-жылдан бери ал Игорь Борисовдун кол астында даярданууда. Учурда Тимур Бейшен Турусбеков атындагы Кыргыз Мамлекеттик дене тарбия жана спорт академиясынын (КМДТСА) студенти.

Тимурдун спорттук жолу оңой болгон эмес. Кыргызстанда тоо лыжасы үчүн заманбап шарттар жетишсиз болгонуна карабастан, ал талыкпай машыгып, эл аралык ареналарда күч сынашкан.

2024-жылы Кореядагы өспүрүмдөр олимпиадасына, өспүрүмдөр жана жаштар арасындагы Азия чемпионатына катышкан. Ошондой эле, 2023–2025-жылдардагы Дүйнөлүк чемпионаттарда күч сынашкан. Сентябрь айында Литвада, ноябрь айында Австрия жана Италияда окуу-машыгуу жыйындарына барып, бир нече расмий мелдештерде ийгилик жараткан. Декабрь айында 6 квалификациялык мелдешке катышып, өзүнүн чеберчилигин далилдеген.

Азыр Тимур Италиянын Милан-Кортина шаарында өтүп жаткан XXV Кышкы Олимпиада оюндарында тоо лыжасы боюнча жарышууда. Ал гигант слалом дисциплинасында 14-февралда, ал эми слаломдо 16-февралда күч сынашат. Кыргызстандан жалпы эки спортчу – Тимур Шакиров жана Артур Сапарбеков катышууда. Бул оюндар 6-22-февралда өтүп, дүйнөнүн мыкты спортчуларынын арасында Караколдун баласынын аты жарк этип жатат.

Тимурдун ийгилиги – Каракол шаарынын сыймыгы. Ал жергиликтүү тоолордон башталган сапарын дүйнөлүк деңгээлге чыгарды. Келечекте дагы чоң жеңиштерди күтөбүз!